Temabaserte

Undervisningsopplegga i Kunsten å lære er tema-baserte, og temaa fungerer som eit rammeverk og struktur for øktene. Kvart tema er bygd opp som eit narrativ, der kvar økt tek elevane nærare eit mål som ligg i slutten av temaet. 

Temaa tek i bruk eit breitt repertoar av kunstfaglege metodar og aktivitetar,  der eitt eller to kunstfag spelar «hovudrolla» innanfor kvart tema. Innhaldet i temaa er meint å vere utfordrande, sosialt, opplevast viktig og ekte, og vere morsomt!

Kvifor er dette viktig?

Djubdelæring 

Tema-baserte undervisningsopplegg er avgjerande for å skape tid og rom for å fordjupe seg i eit tema.  

Forutsigbarheit 

Tema-basert undervisningsopplegg gir forutsigbarheit for lærarar, kunstnarar og elevar.  Vi kan seie at "desse vekene jobbar vi med dette temaet”. 

Kunsten å lære inviterer til raske skift, variasjon og breidde i læringsmetodikk og inneber overrasking og omskiftelege lærings-settingar. Det tematiske rammeverket er difor viktig då det gir tryggleik og ei kjensle av forutsigbarheit gjennom øktene.  

Engasjement

Ved å ta utgangspunkt i noko som interesserer elevane, anten i innhald eller form, så skapar vi ei ramme for læringa som engasjerer. 

Engasjement er avgjerande for elevar som slit med eksekutive funksjonar og er spesielt viktig for å nå fram til desse elevane.

Korleis ser det ut i praksis?  

Kvart Kunsten å lære–tema er strukturert på same måte, med seks økter spreidd over ei periode på to skuleveker. Økt en, to, fem og seks vert leia av læraren og kunstnaren saman. Økt tre og fire vert leia av læraren/lærarane åleine. 

Døme på timeplan

Døme på tema – virus

Tema 15 – Virus fokuserer på dei tre «hovudpersonane» i kroppen sin kamp mot eit virus: 

Lungene (pustefabrikken), virus (dei hemmelege agentane) og immunforsvaret (soldatane). Oppvarminga i tema 15 er ein danse-medley der elevane beveger seg til ulike typar musikk som kvar representerer ein av dei tre «hovudpersonane». 

I hovudaktivitetane jobbar elevane med lungene (pustefabrikken), virus (dei hemmelege agentane) og immunforsvaret (soldatane) gjennom miming, teikning, uteleik, gjennom å samle eksisterande kunnskap i tankekart med meir. 

Kvar refleksjon i tema 15 brukar leire som reiskap for å hugse økta og tematikken.

Elev teiknar lunger i tema 15 - Virus. Marie Othilie Hundevadt

Kvar økt består av tre delar

Kvar økt i Kunsten å lære er bygd opp av tre delar med ei samla og fleksibel tidsramme på 90 minutt:

• oppvarming
• hovudaktivitet
• refleksjon

At tidsramma for kvar økt er fleksibel tyder at dersom elevane er slitne, så er det rom for ein pause eller å slutte tidlegare. Derimot, om elevane er engasjerte og arbeider intenst med ei oppgåve, så har ein rom til å la dei få jobbe vidare. 

Oppvarming

Oppvarminga i Kunsten å lære-øktene har fleire funksjonar, og kan nyttast på ulikt vis avhengig av om ein vil sette fokus på å trygge gruppa, tematikken, samarbeid, lytting, teknikk, arbeidshukommelse eller andre ting. 

Oppvarminga gir høve til å sette fokus på det som er viktigast for gruppa/økta i dette temaet. 

Med repetisjon og auka vanskegrad innan temaet, opplev elevane å meistre stadig meir, og bli flinkare økt for økt. Med praktiske, fysiske oppvarmingsøvingar frå kunstfeltet set ein heile systemet i gang, og ein blir både intellektuelt, emosjonelt, fysisk og sosialt stimulert på ein og same tid. 

Dette veit vi er avgjerande for god læring.

Hovudaktivitet

Hovudaktivitetane i Kunsten å lære -øktene er del av eit tematisk narrativ, og tek kunstfaglege metodar i bruk for å jobbe fram mot målet. 

Hovudaktiviteten bør gi elevane rom for å fordjupe seg og vere aktive med heile seg. Oppgåvene er utforskande og utfordrande med rom for, og oppfordring til, å løyse oppgåvene på ulikt vis.  

Innhaldet i hovudaktiviteten bør vere utfordrande, sosialt, opplevast viktig og ekte, og det bør vere morsomt, då vi veit at dette er viktig for god læring. 

Refleksjon

Refleksjonane i Kunsten å lære-øktene er praktiske og basert på kunstfaglege metodar, og omhandlar på ulikt vis det som er mest relevant i økta eller temaet. 

Dette gjeld tematikken, samarbeidet i gruppa, korleis ein opplevde økta og korleis den kjendes ut,  kva slags metodar ein jobba med og korleis det fungerte for den einskilde. Omsetting av det ein har lært i ein kontekst overført til ein annan kontekst er òg viktig å reflektere over. 

Uansett val av innhald i refleksjonen, veit vi at praktisk refleksjon er avgjerande for læring. 

Her kan du sjå korleis ei økt frå tema 10 – Formfangarar ser ut: